Ende Di Ari Minggu No. 18 - 37

Lirik Lagu Buku Ende HKBP I Buku Lagu Nyanyian Rohani Kristen I BE I Nyanyian lagu Rohani Bahasa Batak I BE HKBP I Ende Di Ari Minggu

Ende Di Ari Minggu No. 18 – 37

BE No. 18 : 1 – 6 Ungkap Bahal Na Umuli ( BL. 84 )

1. Ungkap bahal na umuli, bagas ni Debatangki
Ai tusi do au naeng muli, ganup jumpang Minggu i
Hulului do disi, bohi ni Debatangki

2. Nunga ro au, o Tuhanku, ro ma Ho tu au muse
Ai di bagas ingananMu, las ni roha do sude
Sai bongoti rohangkon, baen ma JoroMi dison

3. Sai pantun pangalahongku maradophon bohiMi
Sai suruhon tu rohangku Tondi Parbadia i
Asa sai tongtong ture tangianghu ende pe

4. Doshon hauma na dumenggan Ma rohangku di joloM
Sai lopokkon ma na denggan Tu bagasan rohangkon
Sai tumpahi hataMi Asa marparbue i

5. Baen togu haporseaon Di bagasan rohangki
Asa unang be rampason Ni sibolis artangki
Sai ditogu hataMi Ma au on tu Surgo i

6. Pangkulingi au Tuhanku Asa hutangihon Ho
Patandahon tu rohangku Na tau pasangaphon Ho
Sai pabosur tondingki Dohot asiasiMi

BE No. 19 : 1 – 5 O Jesus Tatap Ma Tuson ( BL. 32 )

1. O Jesus tatap ma tuson
Pasaor TondiM tu hami on
Sai rohanami dirajai
Dalanannami dipasae

2. Pamujinami baen ture
Buhai ma rohanami be
Patinggil pinggolnami i
Lao tumangihon hataMi

3. Haporseaonnami on
Patogu ma sadari on
Papintor langkanami be
Tu Surgo i tu lambungMi

4. Pamasuk hami on sude
Dung suda bohalnami be
Tu angka na di Surgo i
Tongtong mamuji goarMi

5. Di Ama na sumurung i
Angka di anakNa Jesus i
Di Tondi Parbadia pe
Ma hasangapon sasude

BE. No. 20 : 1 – 5 O Jesus Tuhan Nami ( BL. 6 )

1. O Jesus Tuhannami Sai tatap hami on
Asi rohaM di hami Palua hami on

2. Naeng ihuthononnami Na pinatikkonMi
Naeng pasidingonnami Sogo ni rohaMi

3. Naeng lam botoonnami Taringot tu sude
Tinaon ni Tuhannami Uju targantung i

4. Luhutna dosanami Diporsan Ho disi
Unang saut mate hami Dibahen dosa i

5. On pe o Tuhannami Tumpahi hataMi
Masuk tu rohanami Paian ma disi

BE No. 21 : 1 – 3 Bege Ma Sude Hamu ( BL. 72 )

1. Bege ma sude hamu, Bege ma na marsak roha
Nunga mate utangmu, Nunga sesa sude dosa
Ala asi roha ni Anak ni Debata i

2. I ma Tuhan Jesus i, Sipalua manisia
Ditadingkon Surgo i, asa gabe jolma Ia
Tung mudarNa do use, asa sae dosanta be

3. Bege ma hamu sude saluhut na marsak roha
Ndang adong na mago be Anggo angka na porsea
Di Tuhanta Jesus i, Na humophop sasude

BE. No. 22 : 1 – 5 Nunga Ro Di Parguruan ( BL. 80 )

1. Nunga ro di parguruan Hami on na dison Masihangoluan
Jesus, sai huingot hami HataMi nidokMi Ho naeng dongannami

2. Baen ture pingkirannami unang lao tu na dao mampar rohanami
Sai patinggil pinggolnami tu hataM asa lam huantusi hami

3. Suru Tondi Parbadia baen ture hami be ringgas jala ria
Asa bali haliluan jea pe sasude timbul hangoluan

4. Pabotohon ma tu hami Holong ni rohaMi Na pangolu hami
Asa lam mardosniroha Hami on, sai tongtong Mangalo na roa

5. Jesus ndang diparsineang rohaMi hata ni na ro martangiang
I do pos ni rohanami mida Ho, na dung ro paluahon hami

BE. No. 23 : 1 – 3 Jesus Hami Ro Dison ( BL. 78 )

1. Jesus hami ro dison Asa masihangoluan
I pe ro ma Ho tuson Jala baen ma pardomuan
Ni TondiM tu tondinami Unang mampar rohanami

2. Holom rohanami be Nang parbinotoannami
Molo so ro TondiMi Manondangi rohanami
Ingkon Ho do paturehon Dalannami sidegeon

3. Sondang sian Debata Hatiuron sian ginjang
Baen ture sondangi ma Rohanami asa sonang
Lao manjalo hangoluan PinatupaMi O Tuhan

BE. No. 24 : 1 – 8 Tatap Hami On Na Pungu Dison ( BL. 59 )

1. Tatap hami on na pungu dison
Ai na naeng pujionnami
Denggan ni basaM di hami
Tatap hami on na pungu dison

2. Togu hami on na mardosa on
Ale Jesus Tuhannami
Sai asi rohaM di hami
Togu ma tongtong na mardosa on

3. Sai ramoti be hami on sude
Maradophon musunami
Asa unang mago hami
Sai ramoti be hami on sude

4. Sai urasi be hami on sude
Asa muba rohanami
Jala ias tondinami
Sai urasi be hami on sude

5. Sai ajari be hami on sude
Asa lam huboto hami
Dalan sidalanannami
Sai ajari be hami on sude

6. Sai pintori be hami on sude
Molo unduk rohanami
Manopoti dosanami
Sai pintori be hami on sude

7. Sai padungo be hami on sude
Unang loas modom hami
Di bagasan dosanami
Sai padungo be hami on sude

8. Sai pamasuk be hami on sude
Di na jumpang ajalnami
Molo suda bohalnami
Tu ingananMi hasonangan i

BE. No. 25 : 1 – 2 HataMI Ale Tuhanhu ( BL. 181 )

1. HataMi ale Tuhanku Arta na umarga i
Sai paian di rohangku Unang so hutiop i
Molo so be sitiopan Hata na badia i
Aha nama haojahan Ni haporseaon i?

2. Ale Jesus sai matahon Sai ramoti ma au on
Asa hot haporseaon Di bagasan rohangkon
Sai paringgas ma rohangku Mangoloi di hataMi
Asa mauas di podaMu Songon si Maria i

BE No. 26 : 1 – 3 Dame Nimmu Ale Jesus ( BL. 180 )

1. Dame nimmu ale Jesus LehononMu di bangsoM
TondiMi do na patulus HataMi tu naposoM
Dangol hami jala pogos Ndang tau baen parhaladoM
Tondi parbadia tongos Margogoihon hami on

2. Ale Tondi Sipardame Sai bongoti hami be
Sai pasada rohanami Gok parbue baen sude
Lam patinggil pinggolnami Tumangihon dasdasMi
Asa ganda ringgasnami Pararathon hataMi

3. Sada siradotannami Dipangido rohaMi
Ingkon holong rohanami Mida angka dongan i
Asa tung margogo hami Patupahon hataMi
Sumeahon dirinami Tu Ho nang tu dongan i

BE No. 27 : 1 – 8 Haleluya Ari Minggu ( BL. 86 )

1. Haleluya ari Minggu ari na dumenggan i
Molo iba lao marpungu dohot dongan Kristen i
Ari na sumurung i
Las ni rohangki do i

2. Maradian do tondingku di na jumpang Minggu i
Nasa arsak ni rohangku hulononghon do disi
Tu bagasan roha ni Jesus Kristus, Tuhanhi

3. Na huula ganup ari hutundalhon do disi
Asa tarpasarisari au ngolu ni tondingki
Arta na umarga i jumpang au di Minggu i

4. Lomo ni rohaM o Tuhan Naeng patupaonku do
Parangengku hupadenggan Asa hupasangap Ho
Ulos hatigoran i Lehon ma di tondingki

5. Sai pahehe ma rohangku Sai ajari ma au on
Jala tongos pangapulMu Tu bagasan rohangkon
Baen sombu sadari on Uas ni tondingkinon

6. Pasupasu ma jamita Di huriaMi sude
Sai pasonggop tu pandita Nang tu angka guru pe
Tondi Parbadia i Marsahala baen sude

7. Paimbaru ma padanMu Dohot na porsea i
Pargogoi ma siseanMu Pasangaphon goarMi
Tangiangna, ende pe Sai tangihon ma sude

8. Sai urupi au Tuhanku Paujungkon ari on
Di bagasan tangianghu Songon na hupungka on
Sai huhalungunhon ma SabatMi o Debata

BE No. 28 : 1 – 7 Hata Ni Jahowa ( BL. 203 )

1. Hata ni Jahowa
Sipadame jolma
Hangoluan i
Halalas ni roha
Siapuli roha
Ni na marsak iGogo ni Debatangki
Paluahon na porsea
Sian nasa jea

2. Nasa tinahiNa
Tagan so ditompa
Tano on dope
Nang na tinuduan
Ni sude pelean
Jumpang do museSangkap ni AmaNa i
Dipatulus Jesus kristus
Jolma i ditobus

3. Na rade di hita
Asi ni rohaNa
Nang basaNa pe
Nunga mate Kristus
Nunga sun ditobus
Hita on sudeSangap ma di Debata
Na porsea di hataNa
Do pangoluonNa

4. Hata hangoluan
Do nuaeng diboan
Parjamita i
Na lambok begeon
I nuaeng dilehon
Tu rohanta iHita on dijamitai
Ai didokkon be do hita
Paubahon roha

5. I do haojahan
Na tongtong manahan
Salelengna i
I hajongjonganku
I do haposanku
HangoluankiGogongki tongtong ma i
Mangihuthon tu hataNa
Lao mambaen lomoNa

6. Jesus sai tangihon
Na hupangidohon
Sai asi rohaM
Lehon sipargogo
Asa lao tu Surgo
Au tu banuaMUnang so tu Ho au ro
I pe molo tos hosangku
Tiur baen dalanku

BE No. 29 : 1 – 3 I Ma Tingki Hasonangan ( BL. 186 )

1. I ma tingki hasonangan molo Ho o Jesuski
Pinahusor di pingkiran rodi asiasiMi
Molo Jesus niluluan holan Jesus sinangkapan
Tingki na lehet ma i na pasonang roha i

2. Sai buas naeng lehononMu Jesus asi ni rohaM
Sai girgir do topotonMu na uasan di hataM
Gok do mual hangoluan di bagasan Ho, o Tuhan
Jala sai dapotan do sasude na ro tu Ho

3. Ala ni~i o Tuhannami Topot ma huriaMon
Pasupasu dohot hami Gohi rohanami on
Mauas songon si Maria Di hataM na sun badia
Baen ma hami sasude Asa tung maruli be

BE No. 30 : 1 – 4 Jesus Lehon Hatorangan ( BL. 135 )

1. Jesus lehon hatorangan hapistaran mangantusi hataMi
Lehon mata na marnida dohot roha na umboto dalanMi
Asa tongtong maradophon bohiMi mardalan hami
Asa digomgomi TondiMi ma hami

2. Ganup ari ma ajari hami na di haotoon i dope
Asa lam porsea hami Ho sambing do hangoluannami i
Lam lumeleng lam pasolhot tu rohaM ma rohanami
Hombar tu HataM ma pangalahonami

3. Sai martua ma nasida na mambahen Jesus haposanNa i
Aut tung sura olo hita Jesus i baen parsigantunganta i
Ale Jesus sai patogu hami na di parporangan
Asa dapot di ujungna hamonangan

4. Sai tangihon ale Tuhan Molo martangiang hami be tu Ho
Pasupasu marlobian LehononMu tu na ro manopot Ho
Sai dongani nama hami Asa hot di parpadanan
Mian hami sahat ro tu hasonangan

BE No. 31 : 1 – 4 Ari Na Marhasonangan ( BL. 86 )

1. Ari na marhasonangan, i ma ari Minggu i
Ari i paradianan ni na marulaon i
Sai martua halak i na ringgas marminggu i

2. Songon dia paheanku mandapothon Debata?
Unduk serep ni rohangku, i do abit na tama
Dung adong na songon i, tau ma au di Tuhanki

3. Ale Tuhan sai pangolu, jala sai ajari au
Molo ganggu sai patogu, marsak pe apuli au
Tung patorang hataMi, sai tongtong tu rohangki

4. Pasupasu pangajaran na nidok ni hataMi
Sai patogu parpadanan ni na manangihon i
Sai urupi ma na ro martangiang dompak Ho

BE No. 32 : 1 Nang Lao Ruar Masuk ( BL. 78 )

1. Nang lao ruar masuk pe Jesus sai dongani hami
Pasupasu hami be dohot hangoluannami
Togu hami ale Tuhan sahat tu banua ginjang

BE No. 33 : 1 Antong Sai Dok Ma Amen ( BL. 65 )

1. Antong sai dok ma Amen patorus rohanami tumangkup hataMi
O Jesus Tuhannami patongtong rohanami marhitehite TondiMi

BE No. 34 : 1 Jesus Do Haholonganta ( BL. 222 )

1. Jesus do haholonganta
Ai digarari do dosanta
Tobusta do mudarNa i
Daging dohot tondinami
Tu Ho Jesus hulehon hami
Ai sonang do di tanganMi
Sai jalo hami on Hami huriaMon AnakkonMu
Asi rohaM, Denggan basaM
Tumpakkon ma tu huriaM

BE No. 35 : 1 Sude Hami Na Dison Marpungu ( BL. 199 )

1. Sude hami na dison marpungu do padomu tangan i
Patoguhon padan di mudarMu Tanda hot di Ho sude
Jesus sai paboa ma di hami Lomo ni rohaM di endenami
Dok ma amen situtu Dame, dame di hamu

BE No. 36 : 1 – 3 Pasu Pasu Hami ( BL. 4 )

1. Pasupasu hami o Debatanami
Sai sondangkon bohiMi Tu na pungu on sude

2. Lehon ma di hami Dame ganup ari
Sai pasaor ma TondiMi Tu na pungu on sude

3. Amen hudok hami Ale Tuhannami
Na marasi roha i Sangap ma di goarMi

BE No. 37 : 1 Asi Ni Roha ( BL. 48 )

1. Asi ni roha ni Tuhan Jesus Kristus Holong ni roha ni Debata
Dohot parsaoran ni Tondi Mandongani Hita sasudena

Disusun Oleh : Riris Naomi
Descripsi : Riris Naomi
Promotor : @gurning6bersaudara
Didukung Oleh : kumpulanlirik.com

Ende Di Ari Minggu No. 18 – 37

Terkait

Tinggalkan Balasan Batalkan balasan